За час работы выставу наведала больш за 100 чалавек. Сярод наведвальнікаў - школьнікі з Віцебскай вобласці і горада Маладзечна, а таксама госці з Санкт-Пецярбурга, Масквы і Казані. Экспазіцыя стала прасторай жывога дыялогу пакаленняў і напамінам пра цану, якой была заваявана Перамога.
Гісторыя чалавецтва не ведае іншага прыкладу, калі шматмільённы горад змог вытрымаць гэтакую працяглую аблогу і выйсці з яе пераможцам. Подзвіг Ленінграда — гэта сімвал нязломнай волі, салідарнасці і веры ў жыццё.
Гледачам былі прадстаўлены плакаты і графічныя работы, створаныя ў блакадным кальцы і на перадавых пазіцыях абаронцаў Ленінграда, а таксама ўнікальныя фотаматэрыялы з фондаў Музея Перамогі. Экспазіцыю суправаджала музыка легендарнай сёмай сімфоніі Дзмітрыя Шастаковіча. Менавіта яна прагучала 9 жніўня 1942 года ў вялікай зале Ленінградскай філармоніі: тады ў зале гарэлі ўсе люстры, а канцэрт трансляваўся па радыё. "Ленінградская сімфонія" стала сімвалам перамогі чалавечага духу над страхам і разбурэннем.
Агульная трагедыя назаўжды звязала лёсы Беларусі і Санкт-Пецярбурга вузамі братэрства і памяці. У шостай зале музея мемарыяльнага комплексу "Хатынь" захоўваецца зямля, прывезеная дэлегацыяй Санкт-Пецярбурга з Піскароўскіх мемарыяльных могілак — свяшчэннага месца памяці жыхароў і абаронцаў блакаднага Ленінграда. Гэты сімвалічны жэст яшчэ раз падкрэслівае непарыўнасць гістарычнай памяці і духоўную агульнасць нашых народаў.
Міжнародны віртуальны выставачны праект "900 дзён мужнасці" завяршыў сваю работу, пакінуўшы ў наведвальнікаў глыбокія эмацыйныя ўражанні і напамін пра тое, што памяць пра подзвіг і пакуты мірных людзей не мае межаў і часу.
Беларусь памятае!
