Мемарыяльны комплекс “Курган Славы” створаны на 21-м кіламетры шашы Мінск-Масква (М1) у гонар завяршэння аперацыі па вызваленні Беларусі ад нямецка-фашысцкіх захопнікаў. У аперацыі пад кодавай назвай “Багратыён” прымалі ўдзел чатыры франты: 1-ы Беларускі, 2-гі Беларускі, 3-ці Беларускі і 1-ы Прыбалтыйскі, пад камандаваннем праслаўленых палкаводцаў К.К. Ракасоўскага, Г.Ф. Захарава, І.Д.Чарняхоўскага і І.Х. Баграмяна, а таксама маракі Дняпроўскай рачной флатыліі і эскадрыльі французскіх лётчыкаў-дабравольцаў “Нармандыя”. Значную дапамогу арміі аказалі беларускія партызаны.
У выніку аперацыі “Багратыён” нашы войскі поўнасцю вызвалілі тэрыторыю Беларусі, частку Літвы і яе сталіцу Вільнюс, частку Латвіі, частку польскіх зямель і выйшлі да мяжы з Германіяй.
Распрацоўваючы ансамбль “Курган Славы Савецкай Арміі – вызваліцельніцы Беларусі”, скульптары Андрэй Бембель і Анатоль Арцімовіч, архітэктары Леў Міцкевіч і Алег Стаховіч імкнуліся да суровай і строгай прастаты. Дзякуючы гэтаму, зямля, бетон і метал ажылі і загаварылі, нагадваючы аб тым подзвігу, які здейсніў савецкі народ у адзінаборстве з ворагам.
У аснаванне Кургана была закладзена зямля гарадоў-герояў Масквы, Ленінграда, Валгаграда, Севастопаля, Адзесы, Кіева, Брэсцкай крэпасці-героя.
Урачыстае адкрыццё Кургана Славы адбылося 5 ліпеня 1969 года.
У 2015 годзе была праведзеная маштабная рэканструкцыя мемарыяльнага комплексу з абнаўленнем сістэмы асвятлення і ўстаноўкай каскаду сонечных батарэй.
У сувязі з распачатымі ў 2023 годзе работамі па капітальным рамонце на тэрыторыі мемарыяльнага комплексу была створана музейная экспазіцыя пад адкрытым небам на тэму ваенных падзей, якія праходзілі на тэрыторыі Беларусі ў перыяд Вялікай Айчыннай вайны.
Курган Славы Савецкай Арміі – вызваліцельніцы Беларусі ўключаны ў дзяржаўны спіс гісторыка-культурных каштоўнасцей Рэспублікі Беларусь.
Курган Славы на беларускай зямлі — адзін з самых знакамітых мемарыялаў, прысвечаных савецкім воінам-вызваліцелям.
18 жніўня 1966 г. урад рэспублікі абвясціў аб пачатку будаўніцтва памятнага мемарыяла.
Першую жменю зямлі ў падножжа будучага Кургана Славы кінулі 30 верасня 1966 года. Сюды прыносілі зямлю з месцаў, абвеяных вайсковай славай, размешчаных на тэрыторыі Беларусі і за яе межамі: з гарадоў-герояў Масквы, Ленінграда, Валгаграда, Севастопаля і Адэсы. У падножжы кургана захоўваецца зямля Брэсцкай крэпасці-героя. Тысячы людзей ішлі сюды, на 21-ы кіламетр Маскоўскай шашы, каб ушанаваць памяць тых, хто змагаўся за мір і ўнесці свой уклад у будаўніцтва памятнага мемарыяла.
Праект аказаўся ўнікальным - для таго, каб манумент не асеў і не нахіліўся, усярэдзіне кургана заклалі 30-метровы слупковы падмурак. А каб выключыць апоўзні, бо схіл досыць круты - 35 градусаў - ён пакрыты спецыяльнай травой, якая сваімі каранямі стварае трывалы каркас кургана.
Адкрыццё Кургана Славы адбылося 5 ліпеня 1969 года – у дваццаць пятую гадавіну вызвалення Беларусі, у адзін дзень з Хатынню. Яго аўтары - скульптар А. Бембель, архітэктар А. Стаховіч, скульптар А. Арцімовіч, архітэктар Л. Міцкевіч, інжынер - В. Лапцэвіч.
Рашэнне правесці маштабную рэканструкцыю Кургана Славы было прынята ў маі 2003 года на пасяджэнні Рэспубліканскага аргкамітэта па падрыхтоўцы святкавання 60-годдзя вызвалення Беларусі ад нямецка-фашысцкіх захопнікаў. Асноўную арганізацыю і кантроль за ходам аднаўленчых работ узяла на сябе Федэрацыя прафсаюзаў.
У чэрвені 2004 года на тэрыторыі мемарыяльнага комплексу "Курган Славы" быў створаны музей ваеннай тэхнікі пад адкрытым небам.
Абноўлены Курган Славы адкрыўся 1 ліпеня 2004-га. На ўрачыстай цырымоніі тады прысутнічалі прэзідэнты Беларусі, Расіі і Украіны.
14 лістапада 2009 года на тэрыторыі МК "Курган Славы" заклалі ліпавую алею – Алею Герояў Мінскай вобласці.
Сучаснае аблічча мемарыяльны комплекс набыў у маі 2015 года. Дзякуючы намаганням ФПБ, яе сяброўскіх арганізацый, неабыякавых грамадзян да 70-годдзя Вялікай Перамогі на схілах Кургана цалкам замянілі травяное пакрыццё. Зрабілі капітальны рамонт і рэканструкцыю зношаных прыступак лесвiц. Адрэстаўравалі барэльефныя выявы савецкіх воінаў і партызан, надпіс "Арміі Савецкай, Арміі-вызваліцельніцы — слава!" на ўнутранай частцы дэкаратыўнага кальца.
На гэтым добраўпарадкаванне Кургана Славы не скончылася. У 2017–2018 гадах тут былі ўсталяваны 8 інфармацыйных стэндаў пра найвялікшую наступальную аперацыю Вялікай Айчыннай вайны "Баграціён" і военачальнікаў, якія кіравалі гэтым наступам.
З моманту адкрыцця прайшло ўжо 55 гадоў, але мемарыяльны ансамбль па-ранейшаму прыцягвае розныя сацыяльныя і ўзроставыя катэгорыі наведвальнікаў. У сувязі з распачатымі ў 2023 г. работамі па капітальным рамонце на тэрыторыі мемарыяльнага комплексу была створана музейная экспазіцыя пад адкрытым небам на тэму ваенных падзей, якія праходзілі на тэрыторыі Беларусі ў перыяд Вялікай Айчыннай вайны.
Мемарыяльны комплекс "Курган Славы" уключаны ў дзяржаўны спіс гісторыка-культурных каштоўнасцей Рэспублікі Беларусь.
