Міжнародны турыстычны форум Travel HUB "Садружнасць" з'яўляецца платформай для ўзаемадзеяння дзяржаўных органаў, некамерцыйных структур і прадпрымальніцкай супольнасці, занятых у турысцкай галіне краін Садружнасці Незалежных Дзяржаў, у мэтах павелічэння турысцкіх патокаў, а таксама павышэння ўзроўню пазнавальнасці і прывабнасці культурнага і турысцкага патэнцыялу краін Садружнасці.
7 красавіка 2026 года ў Беларускім дзяржаўным музеі гісторыі Вялікай Айчыннай вайны адбыўся круглы стол "Патрыятычны турызм і супрацоўніцтва дзяржаў СНД у захаванні памяці і выхаванні будучых пакаленняў".
У рабоце круглага стала прынялі ўдзел парламентарыі, эксперты Нацыянальнага цэнтра гістарычнай памяці пры Прэзідэнце Расійскай Федэрацыі, кіраўнікі мемарыяльных комплексаў краін Садружнасці, дзеячы культуры, гісторыкі, прадстаўнікі туріндустрыі дзяржаў СНД. Удзельнікі абмеркавалі ідэю стварэння адзінага патрыятычнага маршруту краін СНД, выкарыстанне сучасных тэхналогій, падрыхтоўку гідаў і сумесную работу мемарыяльных комплексаў.
У рамках мерапрыемства Дзяржаўны мемарыяльны комплекс "Хатынь" прадставіў свой вопыт работы па міжнародным супрацоўніцтве і патрыятычным выхаванні насельніцтва.
Удзельнікі дыскусіі дамовіліся прадоўжыць работу па стварэнні адзінай базы патрыятычных маршрутаў краін СНД, развіваць абмен метадычнымі матэрыяламі і разгледзець магчымасць падрыхтоўкі міждзяржаўнай праграмы падтрымкі маладзёжных патрыятычных тураў.
Пасля круглага стала дырэктар Дзяржаўнага мемарыяльнага комплексу "Хатынь" Дзмітрый Сяргеевіч Вільтоўскі і кіраўнік Нацыянальнага цэнтра гістарычнай памяці пры Прэзідэнце Расійскай Федэрацыі Алена Пятроўна Малышава падпісалі дагавор аб супрацоўніцтве. Рэалізацыя пагаднення прадугледжвае абмен экспазіцыйнымі матэрыяламі, правядзенне сумесных навукова-практычных канферэнцый і выстаў, распрацоўку міжмузейных маршрутаў патрыятычнай накіраванасці, а таксама рэалізацыю адукацыйных праграм для моладзі.
"Стратэгічнае партнёрства дазволіць маштабаваць ужо існуючыя
і стварыць новыя праекты па захаванні гістарычнай памяці,
ужываючы найбольш эфектыўныя практыкі і вопыт
Рэспублікі Беларусь і рэгіёнаў Расійскай Федэрацыі"
Алена Малышава
Асаблівую ўвагу бакі плануюць надаць пытанням процідзеяння спробам фальсіфікацыі гісторыі. Заключаныя дамоўленасці будуць спрыяць узаемадзеянню на якасна новым узроўні і ўносіць уклад у выхаванне будучых пакаленняў на аснове агульных гістарычных каштоўнасцяў і памяці аб подзвігу савецкага народа ў гады Вялікай Айчыннай вайны.
