Дзень пачаўся з урачыстага мітынгу. Першым да падножжа Кургана Славы быў ускладзены вянок ад Прэзідэнта Рэспублікі Беларусь Аляксандра Рыгоравіча Лукашэнкі.
У ліку вышэйшых службовых асоб, якія ўсклалі кветкі да манумента, - прэм'ер-міністр Рэспублікі Беларусь Аляксандр Турчын, старшыня Савета Рэспублікі Нацыянальнага сходу Рэспублікі Беларусь Наталля Качанава, старшыня Мінаблвыканкама Аляксей Кушнарэнка, а таксама іншыя службовыя асобы.
Віншаванне Кіраўніка дзяржавы ўсім прысутным перадаў дзяржаўны сакратар Савета бяспекі Аляксандр Вальфовіч. Ён нагадаў аб нязломнай мужнасці і стойкасці беларусаў у гады Вялікай Айчыннай вайны і заклікаў ніколі не забываць пра подзвіг нашых дзядоў.
Асаблівай падзеяй свята стала прэзентацыя новай кнігі "Курган Славы", якая распавядае пра гісторыю стварэння мемарыяла, прысвечанага ўсім тым, хто ахвяраваў сабой дзеля нашай свабоды і змагаўся на франтах. Асобныя раздзелы прысвечаны аперацыі "Баграціён" і гісторыі "Мінскага катла".
У дзень святкавання Дня Незалежнасці Рэспублікі Беларусь дырэктар ДМК "Хатынь" Дзмітрый Вільтоўскі ўручыў новую кнігу старшыні Мінаблвыканкама Аляксею Кушнарэнку, намесніку старшыні Мінаблвыканкама Аляксандру Ільясевічу, начальніку галоўнага ўпраўлення культуры Мінаблвыканкама Але Шахоцька, начальніку Мінскага абласнога ўпраўлення МНС Сяргею Лапановічу, начальніку УУС Мінаблвыканкама Андрэю Любімаву, старшыні Федэрацыі прафсаюзаў Юрыю Сянько і старшыні Смалявіцкага райвыканкама Мікалаю Парамонаву.
Для гасцей мемарыяла была падрыхтавана шырокая дзённая праграма: майстар-класы па народнай кулінарыі і дэкаратыўна-прыкладным мастацтве, дэгустацыі і продаж прадукцыі аграпрамысловага комплекса, выступленне творчых калектываў, інтэрактыўныя пляцоўкі камітэтаў па працы, спорце і адукацыі, дэманстрацыі спецтэхнікі МНС. Асаблівай акцыяй для гасцей мемарыяла стала магчымасць бясплатна адправіць віншавальную паштоўку ў любую кропку краіны праз "Белпошту".
Вячэрняя праграма на Кургане Славы стала кульмінацыяй святкавання. Музычны выступ Прэзідэнцкага аркестра і ўнікальная відэаінсталяцыя "Голас Кургана" сталі яркімі момантамі вечара. Тысячы людзей разам са старшынёй Мінаблвыканкама Аляксеем Кушнарэнкам выканалі гімн Беларусі ў адзіным парыве гонару за сваю краіну. Завяршылася мерапрыемства маштабным святочным салютам, які стаў сімвалам адзінства і патрыятызму беларускага народа.
